Papa Francis, aliyeaga dunia Jumatatu, Aprili 21, 2025, akiwa na umri wa miaka 88, atazikwa katika Basilica ya Mtakatifu Maria Meja (Basilica di Santa Maria Maggiore) mjini Roma, badala ya makaburi ya Kipapa katika Basilica ya Mtakatifu Petro, kama ilivyo desturi kwa mapapa waliotangulia.
Uamuzi huu unafuata maagizo ya Papa Francis aliyoyaandika tarehe 29 Juni 2022, ambapo alieleza kuwa angetaka kupumzishwa katika basilica hiyo ya kihistoria.
Katika maandishi hayo, Papa Francis alieleza kwamba alikuwa na ibada ya dhati kwa Bikira Maria. Alisisitiza kuwa alitamani kupumzika katika basilica hiyo ya kihistoria – ambayo aliiita “Bethlehemu ya Roma.” Hii ni kwa sababu alikuwa akiitembelea kabla na baada ya safari zake za kitume, akiweka sala zake mbele ya picha ya Salus Populi Romani.
Maelekezo ya Mazishi
Aliomba kaburi lake liwe ardhini, lisilo na mapambo, na lenye maandishi “Franciscus” pekee. Kaburi hilo litawekwa kati ya Kanisa Kuu la Pauline na Kanisa la Sforza. Gharama za mazishi hayo zitalipwa na mfadhili maalum, huku Kardinali Rolandas Makrickas akiwa amepewa maelekezo yote muhimu.
Tukio la Kihistoria kwa Kanisa
Kwa kuchagua Basilica ya Mtakatifu Maria Meja, Papa Francis anakuwa papa wa kwanza kwa zaidi ya karne moja kuzikwa nje ya Basilica ya Mtakatifu Petro. Anafuata nyayo za Papa Clement IX aliyezikwa huko mwaka 1669.
Aidha, Papa Francis anakuwa papa wa saba kuzikwa katika basilica hiyo. Wengine waliotangulia ni:
-
Papa Honorius III (1150–1227),
-
Papa Nicholas IV (1227–1292),
-
Papa Mtakatifu Pius V (1504–1572),
-
Papa Sixtus V (1521–1590),
-
Papa Clement VIII (1536–1605),
-
Papa Clement IX (1600–1669).
Kabla yake, Papa wa mwisho kuzikwa nje ya Basilica ya Mtakatifu Petro alikuwa Papa Leo XIII mwaka 1903. Yeye alizikwa katika Kanisa Kuu la Mtakatifu John Lateran.
