Mashirika ya haki za binadamu yametoa wito wa kufutwa kwa ushuru wa nyumba yakisema ushuru huo ni kichochezi cha umaskini wa kitaifa.
Katika ombi lao, Tume ya Haki za Kibinadamu ya Kenya (KHRC), Transparency International Kenya, Taasisi ya Uwajibikaji kwa Jamii, Inuka Kenya Ni Sisi! na Siasa Place wanahoji kuwa ushuru huo unalenga wafanyakazi wanaolipwa ilhali wasomi wa kisiasa wameachwa.
Pia wanasema kuwa ushuru huo unawanyima wafanyakazi mapato adimu yanayohitajika kwa mahitaji muhimu kama vile chakula, afya na elimu.
Walinukuu data kutoka kwa ripoti ya utendakazi wa kiuchumi ya Ofisi ya Kitaifa ya Takwimu (KNBS) ya 2024, ambayo inaonyesha athari za ushuru huo kwa haki za kijamii na kiuchumi.
Walikashifu serikali ya Kenya Kwanza kwa kugeuza hazina hiyo kuwa chombo cha ufadhili wa kisiasa kwa Uchaguzi Mkuu wa 2027.
