Kanisa Katoliki ulimwenguni hii leo linaadhimisha siku ya Alhamisi Kuu, mojawapo ya sikukuu muhimu zaidi katika historia ya Ukristo, ambapo Yesu Kristo mwenyewe aliweka Sakramenti ya Ekaristi Takatifu.
Alhamisi Kuu ni sehemu ya siku tatu kuu za Pasaka (Triduum Takatifu). Katika kipindi hiki, Yesu Kristo alipitia mateso na kifo. Hatimaye, alifufuka katika siku ya Jumapili ya Pasaka.
Mbali na Karamu ya Mwisho, siku hii ina umuhimu wa kipekee kwa mapadre. Inaaminika kuwa Kristo alianzisha Sakramenti ya Daraja Takatifu siku hii. Yesu aliwapa mitume mamlaka ya kuadhimisha Ekaristi na kuliongoza Kanisa. Kutokana na hilo, siku hii hutumika pia kuwatambua na kuwathamini mapadre kwa mchango wao katika maisha ya kiroho ya waumini.
Katika maadhimisho, makanisa mengi huadhimisha Misa ya Karamu ya Bwana jioni. Ibada hii hujumuisha tendo la kuoshwa miguu. Kitendo hicho kinaiga unyenyekevu wa Yesu alipowaosha mitume wake miguu. Kinafundisha huduma, upendo na kujitoa kwa wengine.
Aidha, katika baadhi ya majimbo, huadhimishwa pia Misa ya Krisma asubuhi, ambapo askofu hubariki mafuta matakatifu yatakayotumika katika sakramenti mbalimbali kwa mwaka mzima. Katika misa hiyo, mapadre huhuisha ahadi zao za kipadre kama ishara ya utii na kujitoa kwao katika wito wao.
Waumini wanahimizwa kutumia siku hii kuwaombea mapadre wao, kuwashukuru kwa huduma wanayoitoa, na kuendelea kuwaunga mkono katika jukumu lao la kichungaji.
